Chennai, Naitung:
U Myntri Rangbah jong ka Tamil Nadu u MK Stalin hynnin ka sngi u la pynlong ïa ka jingpynrung kyrteng na ka bynta ka skhim ka ban pynbiang pisa mar T. 1,000 shisien shi bnai sha ki longkmie, kane ka dei ka jingkular jong ka seng DMK ïa kaba la pynurlong hashwa ban don ka ilekshon Lok Sabha 2024.
Kane ka skhim kan sa ai jingmyntoi sha ki 1 klur ngut ki longkmie ha ka jylla bad yn sa pyntreikam ïa ka naduh ka 15 tarik, Nailur, kaba dei ka lyng-khuh sngikha jong u nongseng jong ka seng DMK u CN Annadurai. Ka sorkar jylla ka la mang kumba T. 7,000 klur na ka bynta ka jingpyntreikam ha une u snem.
Ha kaba ïadei bad ka jingpynlong ïa ka jingpynrung kyrteng ha Dharmapuri distrik, u Myntri Rangbah u Stalin u la ong, “Kane ka dei ka lad ka kabu na ka bynta ka jingim jong ki longkmie ki bym don jingtrei. Kan sa don ka jingkhie-im jong ka jingim bad ki longïing jong ki klur ngut ki longkmie ha kaba yn sa lah ban rat dyngkhong ïa ka jingduk. Kane kan sa ïarap ïa ki longkmie ba kin im ka jingim kaba shaniah halade.”
