Bengaluru, Naitung:
Ki pulit ki la kem ïa lai ngut ki briew kiba la buh da ki jingthoh ha ki Poster kiba kren pyrshah ïa u Myntri Rangbah jong ka Bihar u Nitish Kumar ha ka sngi jong ka jingleit jngoh jong u sha Bengaluru ha ka 18 tarik, Naitung na ka bynta ka jingïalang jong ki seng ka liang pyrshah.
Ïa kine kiba la shahkem la tip kyrteng kum u Sriram, Mohan, bad Nandakumar, kine ki la shahkem halor ka jingbuh da ki Poster kiba don ïa ki kyntien kiba long pyrshah ïa u Nitish Kumar ha ki lynti ïaid kjat kiba don ha Bengaluru. U Mohan bad u Sriram ki dei ki nongbud jong ka seng BJP. Ki Poster kiba la kynthoh pyrshah ïa u Nitish Kumar ki la ong ïa u “ba u long u kyrtong u bym ibit na ka bynta ban ïakhun Myntri Rangbahduh” ïa kine la buh ha ka nongbah.
U Sriram u la siew pisa ban ïoh ïa kitei ki Poster, ka Printing Press jong u Nandakumar ka la shon bad buh ïa kitei ki jingthoh. Baroh lai ngut kiba la shah kem ki dei ki nongshong shnong jong ka Seshadripuram. Ki Poster ki la pynrem jur ïa u Myntri Rangbah ka Bihar halor ka jinghap ka jingkieng Sultanganj ha ka jylla jong u ha kaba ïa kine la buh ha ki lad kiba don ha Bengaluru hashwa ban don ka jingïalang jong ki seng ka liang pyrshah ha ka 18 tarik, Naitung.
