Mumbai, Naitung:
U President jong ka seng Congress u Mallikarjun Kharge um pat lah ban ai ïa ka rai kaba khatduh ha kaba ïadei bad ka jingjied ïa ki kyrteng jong ki MLA ki ban ïakhun ban long nongïalam jong ka liang pyrshah shi taïew hadien ba la sdang ïa dorbar Lyiur ha Maharashtra Assembly ïa kaba la sdang ha ka 17 tarik, Naitung. U nongïalam jong ka seng NCP u Ajit Pawar, uba long mynshwa u nongïalam jong ka liang pyrshah ha Assembly, u la leit ban pynïasoh bad ka sorkar kaba hap hapoh ka jingïalam jong ka seng BJP bad u la shahjied ban long kum u Symbud Myntri Rangbah ha ka 2 tarik, Naitung. Naduh kane ka por, ka shuki ka la sah thylli. Kumba la ïathuh u heh nongïalam jong ka seng Congress, la ong ba ka seng ka la don bun bha ïa ki bynta ban leh ha ka kynhun jong ki 288 ngut ki dkhot jong ka Assembly ha kaba ka la don 45 ngut ki MLA.
Ka la ieh khlem pat lah rai ha kaba ïadei bad ka jingjied nongïalam ha ka liang pyrshah. “U heh ba dei khmih ïa ka seng Congress ha Maharashtra bad u Myntri ka Karnataka u HR Patil u la khot da ka jingïalang jong ki MLA ban ïakren halor ka jingjied ïa ka kyrteng na ka bynta u nongïalam ka liang pyrshah. Kumba la ïathuh ka tyllong khubor, la ong ba ki la don kumba katto katne tylli ki kyrteng ïa kiba la dep ban phah ha ki ar taïew ba la leit. Ha kaba ïadei bad kane, ka kynhun nongïalam jong ka seng Congress kam pat lah haduh mynta ban jied ne ai ïa ka rai kaba khatduh halor ka kyrteng jong u nongïalam ka liang pyrshah.
