New Delhi, Naitung:
Ka sorkar Delhi ka la thmu ban buh 500 tylli ki Water ATM na ka bynta ban pynbiang um dih sha ki nongshong shnong ban pynneh da ka jingpyndonkam da ka Reverse Osmosis (RO) sha ki briew ha ki jaka Slum bad sha kiwei pat ki jaka bun paid kiba kum kine, la ong u Myntri Rangbah u Arvind Kejriwal.
U Myntri Rangbah, uba la leit ban jngoh ïa ka RO Plant bad leit plie paidbah ïa ka Water ATM ha Khajan Basti ha ka thaiñ Mayapuri, u la ong ba saw tylli ki Water ATM la dep ban buh bad 500 tylli kiwei pat la thmu ban buh ha ka bynta kaba nyngkong jong ka jingpyntreikam. Man iwei pa iwei i briew kin sa ïoh da ka Card ha kaba kan sa ailad ïa ki ba kin ïoh ban shim 20 litre ka um ha ka shi sngi na kine ki ATM ha kaba ym donkam ban siew, u la ong.
“Ngi la ju tip ba ki dei tang ki briew kiba riewspah kiba ju don ïa ki RO ha ki ïing jong ki. Mynta kum kine ki jait ki briew ki baduk ruh ha Delhi kin sa ïoh ban dih da ka um kaba khuid,” la ong u Kejriwal.
