Bhopal, Naitung:
Ki pulit jong ka Lokayukta ha Katni kaba don ha Madhya Pradesh ki la lap ïa uwei u briew sorkar ba u la kner ban shim ka pisa kaba T. 5,000 ha ka Lah Sngi U Blei.
Ha kaba ïadei bad kane, ha ka por ba une u briew ïa uba la tip kyrteng kum u Gajendra Singh u la sngewthuh ba u la ngat ha ki kti jong ki pulit, u Singh u la tian ïa ka pisa ha ki lut T. 500 ha ka shyntur jong u bad sdang ban ktha ïa ki. Une u briew u la dei ban don bynta ha ka ban khmih ïa ki jingbuh ryntih shaphang ki jaka puta bad ban lum ïa ka pisa na ki shnong.
Ha ka Video kaba la saphriang kylleng ha ka lah sngi U Blei, la ïohi ba u Singh u la shah synran ha ki pulit ban leit sha hospital. Une u la kbum ïa lut tyngka ha ka shyntur jong u, la ïohi ruh ba u la ktha ïa ka pisa. Haba la poi ha ka jaka ai jingsumar, ki pulit ki la bthah ïa u ba un khlei ïa ka pisa ha ka bol. Hynrei u Singh u la nguid noh ïa ki bad la sah sa tang ki lyngkhot jong ki lut T. 500 ïa kiba la ïoh da ki nongsumar.
Kumba la bna khubor la ong ba uwei u pulit langrut uba la pyrshang ban pynang ïa ka shyntur jong u Singh ban shim ïa ka pisa u la shah dait na ka shympriah kti. U Singh u la shah ïalam sha ka jaka ai jingsumar ban khmih bniah halor ka koit ka khiah jong u ha kaba ki nongsumar ki la ong ba um don jingshah ktah ei ei.
