Srinagar, Naitung:
Ki shipai ka tnat Border Security Force (BSF) ki la ïoh ban khanglad ïa ka jingkhaïi ïa ki jingdih pynbuaid bad ïoh ruh ban siat ïa uwei u nongkhaïi drok uba dei u nong Pakistan ha ki bynta khappud India-Pakistan kaba don ha Samba Sector jong ka Jammu & Kashmir ha ka por shiteng synñia jong ka lah sngi U Blei bad ka sngi Ba-ar jong ka taïew.
“Ki shipai BSF kiba la pynkhreh bha bad pynap shrip ki la ïoh ban pyntroiñ ïa ka jingthmu khaïi jingdih pynbuaid bad ïoh ruh ban siat ïap ïa u nongkhaïi drok uba dei u nong Pakistan,” la ong u nongaiktien jong ka kynhun shipai BSF.
“Ha ka por shiteng synñia jong ka lah sngi U Blei bad ka sngi Ba-ar, ka kynhun jong ki shipai BSF ka la ïoh ban siat ïap ïa u nong Pakistan katba u dang pyrshang ban khaïi ïa u drok lyngba ka thaiñ ha khappud Ramgarh,” u la bynrap.
U nongaiktien u la ong shuh shuh ba ha ka por ba la pynlong ïa ka jingleit khmih bniah, la ong ba la lap ïa saw song ki jingdih pynbuaid ïa kiba la antad ba ki la don ïa ka jingkhia kaba 4 kilo bad ha kane ka jaka la lap ryngkat ïa ka metïap jong u nong Pakistan.
“Ka jingbteng ïa ka jingwad bniah ha kane ka thaiñ ka dang ïai bteng. Ha kaba yn sa tip shuh shuh halor kane ka jingjia”, u la bynrap.
