Kolkata, Naitung:
Ki la don kumba san ngut ki kynthei kiba dei ki nong Bangladesh kiba la shah pyllait bad lai ngut kiwei pat ki briew ki la shahkem ha Siliguri ha ka bynta kaba shaphang Shatei jong ka West Bengal naba ki pulit ki la ïoh ban pynpulom ïa ka jingthmu khaïi briew, la ïathuh ki heh pulit ha ka lah sngi U Blei.
Kum ban pyntreikam hadien ba la ïoh jingtip shaphang ka jingdon jong ki nongkhaïi briew, ka kynhun Special Operations Group (SOG) jong ka Siliguri Metro Police ka la pynlong ïa ka jingleit thwet ha kaba ki lap ïa ki ha New Jalpaiguri Railway Station ha ka miet jong ka sngi U Blei, ki la ong.
Ki lai ngut ki briew kiba la shah kynnoh, ki dei ki nong India, kine ki la sdang ban mih na Dhaka ha ryngkat san ngut ki kynthei ha ka sngi Saitjaiñ. Ki la ïaid lyngba u International Border ha ka thaiñ Domohona kaba don ha Uttar Dinajpur bad ki la poi ha Siliguri. Kine ki lai ngut kiba la shah kynnoh ki la ïalam ïa kine ki kynthei na Bangladesh bad ki la shna da ki kot ki sla sakhi thok ba ki dei ki nong India na ka bynta jong ki, kane ka la long hashwa ban die ïa ki sha kiba bun ki jaka jong ka ri, la ïathuh ki pulit.
Kine kiba la shah kynnoh ki dang shah tohkit, bad ka jingtohkit ka dang ïaid shakhmat ban tip la ki la donkti ne em bad kiwei pat ki kynhun runar ha kiwei pat ki ri ha kaba ïadei bad kane ka kam, la ïathuh shuh shuh ki pulit.
