New Delhi, Naitung:
Ka Supreme Court ha ka sngi Ba-ar ka la buh jingkylli ïa ka sorkar kmie ba balei ka la pynmih ïa kiba bun ki kynhun na ka bynta ban phah khang ban pyndonkam ïa ki dawai pynïap khñiang wat lada ki nongbishar ki la hukum ba ka la paw ba ka dei ka jingleh jong ka sorkar na ka bynta ban ai ïa kane ka rai.
Ka ïingbishar ka la kren ïa kine ki kyntien ha ka por ba ka la bishar bniah ïa ka jingmudui Public Interest Litigations (PIL) ba la buh da ka NGO Vanashakti bad kiwei pat kiba la pynibor pyrshah halor kane ha ka hukum jong u bnai Rymphang jong u snem 2023 na ka sorkar kmie kaba la khang ïa lai jait ki dawai pynïap khñiang.
Kumba long ki jingmudui, la ong ba ha u snem 2020, ka Sub-Committee ïa kaba la thaw hapoh ka jingïalam jong u SK Khurana ka la rai ban khang pyndonkam ïa ki 27 jait ki dawai pynïap khñiang halor ka jingong ba ki lah ban wanrah ïa ka jingpang bampong.
Kum shi bynta ban pynkylla noh ïa kane ka jinglap ïa ka jingshisha, ka sorkar kmie ka la thaw da ka kynhun kaba la khlieh da u TP Rajendran ha u Nailur jong u snem 2022 ha kaba ka la ïai ban da kaba ong ba la dei ban khang ban pyndonkam ïa lai jait ki dawai pynïap khñiang ïa kiba la jer da ki kyrteng.
Haba la pan jubab na ka sorkar kmie halor ka jingthaw kawei ka kynhun hadien kawei pat, ka kynhun nongbishar ba la khlieh da u Chief Justice of India (CJI) u Dhananjaya Y Chandrachud ka la ong, “Balei ba phi la don ïa kiba bun ki kynhun. Phi la ïai thung ïa kin ki kynhuh haduh ba phin da ïoh ïa ka jubab kaba phi sngewïahap.”
