Ahmedabad, Naitung:
U Myntri Rangbah jong ka Delhi u Arvind Kejriwal bad u MP jong ka seng AAP u Sanjay Singh ha ka sngi Ba-ar ki la buh da ka jingkyrpad na ka ïingbishar kum shi bynta ban pynibor pyrshah halor ka jingshah khot hajir jong ki ha ka ïingbishar na ka bynta ka jing-leit mih markhmat jong ki hakhmat ka ïingbishar hynnin ka sngi halor ka jingmudui jong ka Gujarat University.
U nongbishar jong ka Sessions Court u AJ Kanani u la phah da ka shithi sha ka sorkar Gujarat bad sha ka GU ha kaba ïadei bad ka jingkhmih bniah ïa ki jingkyrpad, bad la buh ïa ka tarik na ka bynta ka jingbishar bniah ha ka 5 tarik, Nailar.
U Registrar jong ka GU u Piyush Patel u la buh da ka jingmudui kaba long halor ka jingpynkhlemraiñ pyrshah ïa u Kejriwal bad u Singh, uba long u dkhot jong ka Rajya Sabha, halor ki jingkren jong ki hadien ba ka Gujarat High Court ka la buh sharud ïa ka hukum jong u Chief Information Commissioner ha kaba ïadei bad ka Educational Degree jong u Myntri Rangbahduh u Narendra Modi.
