Ranchi, Naitung:
U nongïalam jong ka seng CPI(M) u la shah siat ïap ha ki briew kiba la shong da ka kali ar shaka ha Ranchi kaba don ha Jharkhand. Kane ka jingjia ka pynlong ïa ki nongshong shnong ba kin pynlong da ka jingïakhih kaba jur, la ïathuh ki pulit.
Kane ka jingjia ka la jia ha ka janmiet jong ka sngi Balang ha Daladali Chowk hapdeng ka por 7 bad 8 baje janmiet ha ka por ba u nongïalam jong ka seng CPI(M) ïa uba la tip kyrteng kum u Subhash Munda, u dang don ha ka jaka treikam jong u.
Ki briew kiba la shong ha ka kali ar shaka ki la leit sha katei ka jaka bad ki la siat da kumba 7 tylli ki kuli ïa u, la ïathuh u State Secretary jong ka seng CPI(M) u Prakash Viplav.
Hadien kane ka jingjia, ki nongshong shong kiba la dap da ka jingbitar ki la mih paidbah bad ki la leit ban pynjulor ïa ki dukan kiba don ha katei ka shnong bad ki la khang lynti ruh ïa ka surok, la ïathuh u heh pulit.
U Munda u la ïakhun ïa ka ilekshon Assembly arsien na Hatia konstitwensi bad ha ka ilekshon shiteng samoi na Mandar konstitwensi.
U IG (Operations) u Amol V Homkar ha ka jingïakren bad ki nongthoh khubor, u la ong, “u nongïalam u la shah siat ïap, ha kaba kane ka la wanrah ïa ki kynrum kynram ha ka synshar khadar.”
Ki la don shuh shuh ki shipai kiba la leit sha katei ka jaka bad ki pulit kin sa shim ïa ki sienjam na ka bynta ban leh ïa kaba donkam halor kane ka jingjia.
