New Delhi, Naitung:
Ki la don lai ngut ki briew kynthup u nong Myanmar kiba la shahkem ha ka por ba ka kynhun National Investigation Agency (NIA) ka la pynlong ïa ka jingleit khynra ha kaba ïadei bad ka jingïoh kurup ïa ki tiar pynbthei bad ki tiar siat ha Mizoram, la ïathuh ki heh pulit.
Ki briew kiba la shahkem ki kynthup ïa u nong Myanmar u Henry Siangnuna (48) bad arngut kiba na ka thaiñ ïa kiba la tip kyrteng kum u J Rohlupuia (55) bad u C Laldinsaga (43), kine kin sa shah rah hakhmat ka Special NIA Court ha Aizawl, ha kaba ka kynhun tohkit kan sa pan jingbit na ka bynta ban ïoh set bad tohkit bniah ïa ki ha kaba ïadei bad ka jingjia kaba la jia ha u snem ba la lah, la ïathuh u nongaiktien jong ka kynhun NIA.
Ki heh pulit ki la ïathuh ba kine kiba la shahkem ki la shah rah ha ka kynhun NIA na ka bynta ka jingtohkit hadien ba ki la dep ban pynlong ïa ka jingleit khynra ha ki saw tylli ki jaka kiba don ha Mizoram, kiba kynthup ar tylli ha Champhai distrik bad mar kawei ha Aizawl bad Lawngtlai distrik, ha ka lah sngi U Blei.
Ïa ki jingleit khynra la pynlong ha ki ïing jong ki briew kiba la sha suba donkti ha ka ban tuh bad khaïi ïa ki tiar pynbthei, ki tiar siat na Mizoram sha Myanmar.
Kiba bun ki tiar kiba long beaiñ la ïoh ban kurup ha ka por ba la pynlong ïa ki jingleit khynra, la ong u nongaiktien jong ka kynhun tohkit. Ka jingtohkit jong ka kynhun NIA ïa kine ki briew ka dang ïai bteng.
