Jammu, Naitung:
Kiba bun na ki khynnah, kynthup ïa kito kiba na ki skul Army Public Schools, ki la ïoh ïa ki Call bad ki WhatsApp Message na ki Pakistani Intelligence Operatives (PIOs), ha kaba la bthah ïa ki ba ki la dei ban pynïasoh bad ki kynhun ha ki lad phah khubor bad ban phah ïa ki jingtip kiba bniah, la ïathuh ka tyllong khubor kaba la wan na ka tnat shipai Army ha ka sngi Ba-ar.
Ki khynnah pule ki ju ïoh ïa ki Call bad ki WhatsApp Message na ki PIO na ki ar tylli ki Mobile Phone Number kata na u 8617321715, 9622262167, la ïathuh shuh shuh ki shipai.
Ki briew kiba la buh ïa ki jingthoh bad pynithuh ba ki dei ki nonghikai skul, ki la phai khmat sha ki khynnah ha kaba ki la bthah ïa ki ba kin pynïasoh bad ki “new class groups” bad ki la phah ïa ki ïa ki One-time Passwords (OTPs), la ïathuh ka tyllong khubor, ha kaba ka la bynrap shuh shuh da kaba ong ba wei ba ki khynnah pule kin pynïasoh bad kine ki kynhun, kin sa shah pan ïa ki jingtip kiba bniah.
Katkum ka jingïathuh jong ki Principal jong ki Army Public School, la ong ba ki PIO ki ju kylli bniah na ki khynnah shaphang ka kam jong u kpa, ki Routine bad ki por ha skul, ki kyrteng jong ki nonghikai, ki Uniform bad kiwei kiwei.
Ki skul bad ki kolej ki la shah bthah ba ki la dei ban pynshai sha ki nonghikai bad ki khynnah pule shaphang kane, la ong ka tyllong khubor. Nalor kane ka la bthah ruh ïa ki kmie ki kpa jong ki khynnah skul ba ki la dei ban husiar bha na kum kine ki Call ki bym don jingshaniah.
