New Delhi, Naitung:
Ki la don palat 34,000 ngut ki khynnah kiba la iehnoh shiteng por ïa ki jingpule jong ki ha ki kyrdan kiba kham shalor kum ha ki Central University, ki IIT, NIT, IIM, bad NIT, hapdeng u snem 2019 bad 2023, ha kaba mar shiteng na ki ki dei kiba shah kynthup hapoh ka Scheduled Caste, Scheduled Tribe bad Other Backward Class, la pyntip ka tnat pule-puthi ha ka por ba don ka dorbar hapoh Parliament ha kine ki khyndiat sngi ba la leit.
Kunmba la ïathuh la ong ba haba la khmih bniah ha kaba ïadei bad ka jingdon jong kiba bun ki khynnah pule kiba la iehnoh shiteng por ïa ki jingpule jong ki la shem ba ki la don bun ki daw.
Kumba la wad, la ong ba ki daw ki dei na ka jingbym kotbor shuh ban kyrshan bad kiwei pat kiba long na ki daw shimet jong ki.
Kum shi bynta ban ai jubab halor ka jingkylli ba la buh da u dkhot jong ka Rajya Sabha jong ka seng Bharatiya Janata Party Rajya Sabha u Sushil Kumar Modi, u Myntri khynnah jong ka tnat pule-puthi u Subhas Sarkar u la pynbiang ïa ka jingbuh jingkheiñ ha kaba ïadei bad ka jingdon jong ki khynnah pule kiba la iehnoh tang shiteng por ïa ki jingpule jong ki ha ki kyrdan kiba kham shalor ha kaba la batai shai ba kiba bun na kine ki khynnah kiba la sangeh noh tang shiteng por ïa ki jingpule ki dei na ka Postgraduate bad PhD Programmes.
Katkum ka jingbuh jingkheiñ kumba la pynbiang da ka tnat ba dei khmih, la ong ba na ki 34,035 ngut ki khynnah kiba la iehnoh shiteng por ïa ki jingpule, kiba bun ki dei na ki Central University ha kaba ki la don 17,454 ngut, bud sa kiba na ki Indian Institutes of Technology (IIT) da 8,139 ngut, na National Institutes of Technology (NIT) da 5,623 ngut, na Indian Institutes of Science Education and Research da 1,046 ngut, na Indian Institutes of Management da 858 ngut, na Indian Institutes of Information Technology (IIIT) da 803 ngut bad na ki Schools of Planning and Architecture (SPAs) 112 ngut.
