Kolkata, Naitung:
Ka Myntri Rangbah jong ka West Bengal ka Mamata Banerjee ha kine ki khyndiat sngi ba la leit, ka la kynnoh hapoh Assembly ba ka seng BJP na ka liang pyrshah ka la thmu ban wanrah ki kynrum kynram hapoh ka jylla bad ban wanrah ka jingïapait hapdeng ki briew bad ban pynthohbria ïa ka jylla hashwa ka jingpynlong ïa ka General Election ha u snem ban wan.
Ha ka jingai jingkren jong ka hapoh Assembly ha ka por ba don ka dorbar, ka Banerjee ka la pynshisha da kaba ong ba ka la ïoh jingtip ha kaba ïadei bad ka jingthmu jong ka seng BJP ha kaba kane ka la paw ha ka por ba don ka jingïalang ba dang shen ba la pynlong ha New Delhi bad ki heh nongïalam jong ka seng na kylleng ki jylla.
Ka la pynshisha da kaba ong ba katkum ka jingïoh jingtip la ong ba ka seng BJP ka la thmu ruh ban thong pisa sha kano kano ka seng kaba lah ban pynpait ïa ka Vote jong ka seng Trinamool Congress.
Kane ka jingthmu jong ka liang pyrshah ka long naba ka kwah ban bat ïa ka jingsynshar hapoh ka jylla.
Ka Myntri Rangbah kaba la ïai bteng ka jingkren wat hadien ba ki MLA ka seng BJP ba la lamkhmat da u Adhikari ki la mih na ka ïingdorbar, ka la ñiew kam kai halor baroh ki jingkynnoh jong ka seng ka liang pyrshah shaphang ka jingbym lah ban wanrah ïa ka synshar ka khadar katkum ki kyndon ha ka jylla ha ka por ba don ka Rural Polls.
Ka la ong ba ki la don kumba 29 ngut ki briew kiba la ïap naduh ba la pynbna ïa ki tarik ban pynlong ïa ka ilekshon.
Ka Myntri Rangbah ka la ïathuh ba ki kam thombor pyrshah ïa ki kynthei ki la jur bha ha ki jylla ba la synshar da ka seng BJP bad ong ba ha West Bengal kiba kum kine ki jingjia ki dang duna.
