Amaravati, Nailar:
U Councillor ha Anakapalli distrik kaba don ha Andhra Pradesh u la thab ïalade da ka slipar namar ka jingshet kylla ïa ki nongthep vote, ha kaba um shym la lah ban pynurlong ïa ki jingkular ba u la khlei ha ka por ba don ka ilekshon.
U Mulaparthi Ramaraju, uba long u Councillor, jong ka Narsipatnam Municipality (Ward 20), u la pynpaw ïa la ka jingsngew bitar ha ka jingïalang jong ka Council halor ka jingbym lah ban pynurlong ïa ki jingkular sha ki nongthep vote. Ka Video ha kaba ïadei bad kane ka jingleh jong u ka la saphriang kylleng.
“Nga la long u Councillor na ka bynta ki 31 bnai, hynrei ngam shym la lah ban leh ei ei ha ka ban weng ïa ki jingeh ba la ïakynduh da ki paidbah ha kaba ïadei bad ki nala, ka bording, ki jaka pyllang jaboh, ki surok bad kiwei pat ki jingeh kiba don ha ka Ward jong nga,” la ong ka tyllong khubor kumba la kren da u Ramaraju ha kaba kane ka la pynlong ïa u ba un thab dalade ïalade da ka slipar.
U la kynnoh ba ki heh ba dei khmih jong ka tnat Municipal hapoh ka thaiñ ka la ieh beiñ ïa ka Ward 20 bad um shym la ïoh wat tang ban pynpoi um wat sha iwei ruh na ki nongkyrshan jong u. U Ramaraju u la ong ba kan kham bha na ka bynta jong u ba un ïap ha kane ka jingïalang naba um shym la lah ban pynurlong ïa ki jingkular sha ki nongthep Vote.
