Chandigarh, Nailar:
Kiba bun ki nongshong shnong jong ka jylla Punjab ki dang shah ktah jur na ka jingshlei um kat haduh mynta. Kiba bun na ki longïing ki la duh jaka sah bad kumjuh ki jingdon jingem na ka jingshlei um.
Ki la don kumba 41 ngut ki briew kiba la ïap katba 1,616 ngut kiba dang sah ha ki 173 tylli ki jaka sah ba shipor hadien ba ki la shah ktah jur na ka jingshlei um kaba la ktah jur ïa ka jylla Punjab dang shen, la ïathuh ki heh ba dei khmih ha ka sngi Ba-ar.
Ki la don kumba 19 tylli ki distrik, kiba kynthup ïa ka Tarn Taran, Ferozepur, Fatehgarh Sahib, Faridkot, Hoshiarpur, Rupnagar, Kapurthala, Patiala, Moga, Ludhiana, SAS Nagar, Jalandhar, Sangrur, SBS Nagar, Fazilka, Gurdaspur, Mansa, Bathinda bad Pathankot kiba la shah ktah na ka jingshlei um. Ka sorkar ba ki kynhun pyllait im ki la lah ban pyllait im ïa kumba 27,286 ngut ki briew na ki thaiñ ba la ngat ha ka jingshlei um, la ïathuh shuh shuh ki heh ba dei khmih.
Katkum ka kaiphot jong ka Revenue Department, la ong ba ki la don kumba 41 ngut ki briew kiba la ïap na ka daw jong ka jingshlei um. Kiba bun ki distrik jong ka Punjab bad Haryana ki la shah ktah jur da ka jingwanhap jong u slap uba jur ha kaba ka la pynthut ïa ka rukom im jong ki briew kaba man ka sngi bad ka jingshlei um ka la buh jingeh ïa ki nongshong shnong bad pynjulor lut ïa ki jaka rep.
