Jammu, Nailar:
Uwei u nong Pakistan uba la wan rung tuh sha ki bynta jong ka ri u la shah siat ïap ha ki shipai Border Security Force (BSF) ha ki bynta jong u International Border ha Jammu & Kashmir ha ka Lah Sngi U Blei. Kane ka dei ruh ka jingjia ha ka sien kaba ar tang ha ka shi taïew, la ïathuh ki heh shipai ha ka jingïakren bad ki nongthoh khubor.
Une u bar ri u la shah siat ha ki shipai naba um shym la patiaw ïa ki hukum ba la ai da ki shipai bad u la pyrshang ban jam sha khappud hajan Jabowal Border Outpost kaba don ha Arnia Sector ha ka por 1.45 mynstep jong ka lah sngi U Blei, la ïathuh shuh shuh ki shipai.
Kum shi bynta ban pynshisha halor ka jingjia, u nongaiktien jong ka tnat shipai BSF u la ong, “Ha ka por shiteng synñia kata hapdeng ka 30 bad ka 31 tarik, Naitung, ki shipai pahara ki la ïohi ba la don ba ïaid ha ki bynta jong u International Border (IB) ha ka thaiñ khappud Arnia. Une u nongwan rungtuh u la pyrshang ban rung pyrshah ïa ki jingker bad ki shipai ki la siat noh ïa u naba u la pyrshah ïa ki hukum jong ki,” u la ong. Khlem da pynslem, ïa katei ka thaiñ la pynjur ka jingker kut bad kumjuh ka jingleit thwet ka dang ïaid shakhmat haduh mynta, la ïathuh shuh shuh ki heh shipai.
