Srinagar, Nailar:
Ka jingleit wad kaba jur na ka bynta u shipai uba la jah rngai ïa uba la tip kyrteng kum u Javed Ahmed ha Kulgam, kaba don ha ki bynta ba shaphang Shathie jong ka Kashmir ka la ïaid la ar sngi lynter ha ka Lah Sngi U Blei.
Haduh kane ka sngi ym pat lap satia ïa une u shipai wat lada ki shipai pahara ki la kylli na kiba bun ki briew shaphang jong u bad mynta ki dang khmih bniah ïa ki jingïakren Phone jong u bad kumjuh ki jingtip kiba bniah lyngba ka Mobile jong u.
U heh pulit u la ïathuh ba ka la don ka jingïatreilang hapdeng ki pulit bad ki shipai ka tnat Army bad kumjuh jong ka CRPF na ka bynta ban leit wad ïa u shipai uba dang jah rngai ha Asthal kaba don ha Kulgam bad la leit wad ruh ïa u sha ki jaka khlaw kiba don ha marjan bad katei ka jaka, la ïathuh u heh pulit.
Javed Ahmed Wani, uba la 25 snem ka rta u dei jong ka kynhun JAKLI bad u la shah thung kam ha Leh Ladakh, une u la jah naduh ka janmiet jong ka sngi Saitjaiñ hadien ba u la mih na ïing ban leit thied jingbam.
Une u shipai uba la leit ban rung ha ka kam shipai ha u snem 2014, u la don ha ka shuti bad une u la dei ban sdang biang ïa ka kam ha ka sngi kaba bud kata ha ka sngi U Blei.
Ïa ka kali kaba u la shong la lap na ka shnong Paranhall kaba don ha Kulgam ha kaba ki jingkhang jong ka ki la plie.
