Gangtok, Nailar:
Ki pulit jong ka Sikkim ki la pynlong ïa ka jingleit khynra ha ka Multi-Purpose Cooperative Society (MPCS) kaba don ha Melli hapoh ka Namchi distrik, ha kaba ïadei bad ka jingjia ba la mudui pyrshah ïa u nongïalam jong ka Citizen Action Party (CAP) u Ganesh Rai.
Kumba la ïathuh ka tyllong khubor kaba la wan na ki pulit, la ong ba ka jaka treikam jong ka Melli Dara MPCS ka la shah khynra khnang ban ïohlum ïa ki sabut na ki kot ki sla.
Uwei u briew ïa uba la tip kyrteng kum u Nigam Tamang u la buh da ka jingmudui ha ka jaka treikam jong ki pulit kaba don ha Melli ha ka 1 tarik, Nailar, ha kaba u la kynnoh ba u Ganesh Rai u la pyndonkam bakla ïa ka pisa kaba la mang da ka SISCO Bank kaba hap hapoh ka Namchi distrik na ka bynta ka Ginger Crop Loan Scheme.
U Tamang u la batai shuh shuh hapoh ka jingujor ejahar ba la ïoh tang T. 50,000 ka pisa ba la ïoh ban pdiang haba ka pisa kaba la mang ka la dei T. 1 lak. “Nga la ïohi ïa ki 33 tylli ki kyrteng jong ki nongshong shnong jong nga ha ka thup kyrteng jong kiba dei ban ïoh myntoi ha kaba ïadei bad ka jingïarap pisa kaba long halor u sying. Haba nga la tohkit bniah, nga la sngewthuh ba ki la ïoh ïa ka pisa tang shiteng na kaba la mang,” la ong ka jingmudui.
Nalor kane, la ong ba u Ganesh Rai u la sei tuh ïa ka pisa lyngba ki kyrteng jong kiba bun ki nongrep jong ka Melli Dara da kaba pynkhreh bad wanrah da ki kot sakhi thok bad sei tuh ïa ka pisa jingïarap”. Ki pulit ki la buh jingthoh halor kane ka jingjia hapoh ka kyndon IPC 409, IPC 420, IPC 468, IPC 471bad IPC 12B.
