New Delhi, Nailar:
Ki la jan don kumba 12 ngut ki briew kiba la jah rngai hadien ka jingther jong u slap uba jur ha kaba kane ka la wanrah ïa ka jingshlei um kaba jur bad kumjuh ïa ka jingtwa khyndew ha ka surok Kedarnath Yatra kaba don ha Uttarakhand ha ka miet jong ka sngi Palei.
Kiba bun na ki dukan ki la shah rong noh hajan ka thaiñ Gaurikund. Kumba la ïathuh u heh pulit, la ong ba ka jingpyntreikam ban ai jingïarap bad pyllait im sha ki nongshong shong da ka kynhun National Disaster Response Force (NDRF) bad ka State Disaster Response Force (SDRF) ka dang ïai bteng.
Kumba la ïoh khubor ha kaba ïadei bad ka jingjah jong ki briew, la ong ba ki la don katto katne ngut kiba na Nepal, la ong u heh pulit. Ïa ki briew kiba la jah la tip kyrteng kum u Vinod (26), Mulayam (25), Ashu (23), Priyanshu Chamola (18), Ranbir Singh (28), Amar Bohra, ka kurim jong u ka Anita Bohra, ki khun jong ki kiba kynthup ïa ka Radhika Bohra bad ka Pinki Bohra, bad ki khun shynrang u Prithvi Bohra (7), Jatil (6) bad u Vakil (3), la ïathuh ki heh pulit.
Ha kaba ïadei bad kane, ka la don ka jingbuh jingmaham ïa ki briew ba ki la dei ban kynriah jaka shwa shipor namar ka jingap jingma na ka jingshlei um bad ka jingtwa khyndew kiba sah ha Pauri, Tehri, Rudraparayag bad Dehradun naba ka jinghap slap kan sa ïai bteng. Bad la phah husiar ruh ïa kiba shong basah ha Chamoli, Nainital, Champawat, Almora bad Bageshwar.
Ka jingleit wad ïa kine ki briew kiba la jah ka dang ïai bteng ha kaba haduh ba la thoh ïa ka khubor ym pat lap satia ïa ki.
