New Delhi, Nailar:
Ka Supreme Court hynnin ka sngi ka la pynkynriah tarik ha kaba ïadei ba ka jingbishar bniah halor ka jingkyrpad jamin shipor jong u nongïalam ka seng AAP u Manish Sisodia ha kaba ïadei bad ki ar tylli ki mukotduma shah kynnoh donkti jong u ha ki kam bamsap ba la mih na ka jingpyntreikam halor ka kyiad ha Delhi ïa kaba la tohkit da ka kynhun CBI bad ED haduh ka 4 tarik, Nailur.
U Sisodia u la phah ka jingkyrpad ban pyllait jamin shipor ïa u namar ka jingdonkam ban phah sumar ïa ka kurim jong u bad kane ka long ka daw kaba u la ai. Ha kaba ïadei bad kane, ka kynhun nongbishar jong u Justice Sanjiv Khanna bad u Justice SVN Bhatti, ki la pynshai da kaba ong ba katkum ka jingkhmih bniah na ka kaiphot ha kaba ïadei bad ka jingsumar ïa ka kurim jong u Sisodia, la ong ba kam shym la shah ktah ei ei.
Ka kynhun nongbishar ka la ong ba ka Supreme Court kan sa khmih bniah ha kaba ïadei bad ka jingkyrpad jamin shipor jong u Symbud Myntri Rangbah barim jong ka Delhi ha ryngkat kawei pat ka jingkyrpad jamin ba shipor jong u ha kaba ïadei bad kine ki mukotduma.
