New Delhi, Nailar:
Kum ka jingai jubab halor ka jingkylli ba la kylli da u dkhot jong ka Rajya Sabha jong ka seng Communist Party of India (Marxist) u V Sivadasan, u Myntri khynnah jong ka sorkar kmie uba dei khmih ïa ka tnat pule-puthi u Subhas Sarkar u la phah ïa ki jingïohlum jingkheiñ ha kaba ïadei bad ka jingdon jong ki khynnah pule kiba la ïap da kaba dkhat hi ïa la ka jong ka jingim ha kylleng ki skulbah, ki Indian Institutes of Technology (IITs), National Institutes of Technology (NITs), Indian Institutes of Information Technology (IIITs), Indian Institutes of Management (IIMs) bad Indian Institutes of Science Education and Research (IISER), ha ki san snem ba la leit.
Katkum ka jingïohlum jingkheiñ, na kine ki 98 ngut ki khynnah pule, 39 ngut ki dei na ki IIT, 25 ngut na ki NIT bad 25 ngut na ki Central University, 4 ngut na ki IIM, 3 ngut na ki IISER bad 2 ngut na ki IIIT. Na ka jingbuh jingkheiñ la lap ba 20 tylli ki jingjia ki dei kiba la jia ha u 2023, haduh mynta ki la don 24 ngut ha u 2022, mar 7 ngut ha u snem 2021 bad 2020, 19 ngut ha u snem 2019, bad 21 ngut ha u snem 2018. Ki la don kumba 23 tylli ki IIT ha India, 31 tylli ki NIT, 56 tylli ki Central University, 20 tylli ki IIM, 25 tylli ki IIIT bad 7 tylli ki IISER.
