Bengaluru, Nailar:
Ki pulit jong ka Bengaluru ki la thmu ban nang pynbha shuh shuh ha kaba ïadei bad ki rukom pyntreikam da kaba phong ha ka met jong ki da ki Camera. Kan long kaei kaei kaba sngewphylla hynrei ïa kane ka jingthmu la wanrah da u City Police Commissioner u B Dayananda khnang ban tip shai ïa ki rukom treikam jong ki pulit ha ka tnat bad ban pynduh ïa ka kam bamsap.
U Police Commissioner u B Dayananda u la ong ba ki la don kumba 111 ngut ki pulit jong ka Law and Order Department ki ban sa shah ai jinghikai pyntbit bad mar kawei pa kawei ka Camera yn sa ai ha kine ki sngi.
Wat ki heh pulit kiba dei ban trei ha ka por mynmiet ruh ki la hap ban pyndonkam ïa ki Camera kumba la hukum da u Commissioner. Ha kaba ïadei bad kane, kim dei ba kiar ha ka ban pyndonkam ïa kine ki Camera ha ka por ba ki kem ïa ki nongpynkheiñ aiñ ne ha ka por ba tohkit ïa ki runar halor kino kino ki jingjia.
Kumba la ïathuh u heh pulit, la ong ba u Police Commissioner u la pynkhreh ïa ki kyndon ha kaba ïadei bad ka jingthmu ban pynduna ïa ki kam bamsap bad ban nang ban kyntiew shuh shuh ha kaba ïadei bad ki jingtreikam bahok jong ki pulit.
