Shillong, Nailar:
U trai jong ka Anjalee Petrol Pump kaba don hajan ka lad ban rung sha Ïew Mawlong, u la pynitynnad da kaba dro da ki dur jong ki shynrang bad kynthei kiba riam tynrai ha ki kynroh jong katei ka jaka theh umphniang kali.
Katkum ba la ïoh lum jingtip kane ka jaka theh umphniang kaba la tei naduh u snem 1927 bad kaba la kot mynta la 96 snem, hynrei ka sorkar jylla ka la thmu mynta ban pynkynriah noh ïa katei ka jaka theh umphniang sha Hynriew Mer, Upper Shillong kaba dei ka jaka ba peit da ka tnad ri jingri jong ka sorkar jylla khnang ban wanrah ïa ka jingkylluid ïa ka sor Shillong.
Kum ban shu pynkynmaw ha ka 3 tarik mynta u bnai, ka Federation of Khasi Jaiñtia & Garo People (FKJGP) Upper Shillong Circle ka la leit ban ïakynduh ïa u Myntri ka tnad ri jingri ka sorkar jylla, u Bah Alexander Laloo Hek ban pynpaw ka jingpyrshah halor ka jingthmu ka sorkar jylla ban ai jaka ha Upper Shillong ban pynkynriah ïa ka Petrol Pump na Anjalee.
Ka jingpyrshah ka FKJGP ïa katei ka jingthmu ka long namar u trai jong ka Petrol Pump Anjalee u kwah haduh 13500 square feet ban shna ïa ka Petrol Pump kaba thymmai. Katba ka petrol pump kaba don ha Anjalee mynta ka don ym duna eiei ïa ka 2000 square feet.
Shuh shuh ka FKJGP ka pynpaw ka jingpyrshah ba kam kwah ba ka sorkar kan ai jaka sha kiwei jaitbynriew wat la ka dei ha jaka jong ka sorkar.
Ka jingthmu ka sorkar ban rah ïa kane ka Anjalee Petrol Pump sha Hynriew Mer ka long shibynta ban pynsuk ïa ki paidbah ban theh umphniang ynda la shna ïa ka surok saw bynta (four lane) na Umshyrpi shaduh Hynñiew Mer.
Haba ïakren bad u manager jong ka Anjalee Petrol Pump um kwah ban kren eiei namar u la pynpaw ba kane ka jingthmu baroh ka dei ka jingleh ka sorkar jylla ym na u trai ka petrol pump.
La ïohi ruh ba ïa kane ka jaka theh unphniang la pynphuh pynphieng ha ki kynroh da kaba dro da ki dur ba riam tynrai.
Ki khubor kiba dang shu ïoh lum la ïathuh ba ka seng FKJGP ka dang ïakren bad ka synjuk ki rangbah shnong Upper Shillong ban kham khlaiñ ka jingpyrshah.
