Shillong, Rymphang 25
U MLA ka United Democratic Party (UDP), Bah Synshar Kupar Roy Lyngdoh Thabah ha ka Lah Sngi U Blei u la kular ban trei kham bha shuh-shuh hadien ba u la shah jied kum u MDC sha ka Khasi Hills Autonomous District Council (KHADC).
U Bah Thabah uba la poi sha ka thong ha kane ka kynti u la ïoh 9617 ‘vote’ bad u la jop ïa u kyrtong ka National People’s Party (NPP), Bah Samlin Malngiang uba wan ba-ar da 281 ‘vote’.
U Bah Malngiang u la ïoh 9336 ‘vote’.
“Kaba nyngkong eh nga ainguh ïa u Blei…kane ka jingïaleh ka long kaba itynnad. Kumba ngi khmih lynti, kumta hi ka long, mynta ym dei ba nga long tang kum u MLA, hynrei kum u MDC ha kajuh ka por. Kumta ngan pyrshang ban nang trei shitom shuh-shuh,” ong u Bah Thabah haba kren sha ki lad pathai khubor.
U la ong ruh ba u la trei shitom ha konstitwensi bad u khmih lynti na bynta kaba bha tam mano ban ïalam ïa ka EC ha KHADC.
La ka UDP ka long kaba kloi ne em ban ïatreilang bad ka VPP, u la ong, “Nga tharai ngi long kiba pdiang beit, hynrei nga sngew ba ngin hap ïa shong shibit ban pynbeit halor kane. Ka jingshim rai jong ka seng kan long kaba khatduh.”
Haba jubab, u la ong, “Kane baroh nga sngew ka dei ka jingpynïaid ba stad uba najrong namar baroh ki la ai ka jingïakhun kaba itynnad, kumjuh ma nga. Sha ngi, ngi la poi sha ka thong , shawei pat ka long da kawei ka khubor, ngan ong kumno…nga shim ba kane ka dei ka rai jong u paidbah bad ngin burom ïa ka.”
Shuh shuh u la bynrap, “Kane ka jingjop ka dei ka jingieid bad jingshaniah jong u paidbah ka Sohïong. Mynta ym tang kum u MLA hynrei kum u MDC, ngan trei kham bha shuh-shuh na bynta ka konstitwensi.”
