Srinagar, Nailar:
Ka kynhun jong ki pulit bad ki shipai, shi sngi hadien ba ki la ïasiat bad ki lehnoh ha ki bynta jong u Line of Control (LOC) ki la pynshisha ba ki arngut ki lehnoh kiba la shah siat kumba la pynbna hashwa, ki kynthup ïa u Commander jong ka kynhun lehnoh Hizbul Mujahideen, uba long ruh uwei napdeng ki lehnoh uba la laitim la kham slem na kti jong ka aiñ ïa uba la don hapoh ka seng naduh u snem 1996, kine baroh arngut ki la ïap na ka jingshah siat.
Ka jingshah siat jong kine ki lehnoh ka la long kum shi bynta jong ka jingkhanglad jong ki shipai ïa ka jingwan rungtuh jong ki na ki bynta jong u LoC ha Poonch kaba don ha Jammu & Kashmir ha ka lah sngi U Blei.
Ha kaba nyngkong, uwei u lehnoh u la shah siatïap katba uwei pat la suba ba u la mynsaw na ka jingsiat jong ki shipai ïada khappud ha katei ka sngi ha ka por ba ki dang pyrshang ban rung beaiñ na ki bynta jong u Line of Control (LoC) ha Poonch distrik jong ka Jammu & Kashmir.
Ki shipai kiba la khreh lypa ha Degwar Sector kaba don ha ka distrik haba ki la ïohi ba la don ki briew kiba thmu ban rung sha ki bynta jong kane ka ri ha ka por ba dang step bha ha ka lah sngi U Blei ki la tur bad siat sha ka bynta ba rung kine ki bar ri, la ïathuh ki heh shipai.
Na ka jingkhmih bniah, ki shipai ki la lap ruh ïa shibun ki tiar siat bad ki tiar pyndonkam jong ki lehnoh.
Ïa u nongïalam jong ka kynhun lehnoh uba la shah siat ïap la tip kyrteng kum u Muneser Hussain uba dei u khun jong u Sattar Mohammad uba dei u nongshong shnong jong ka Bagyladra Poonch.
