Chandigarh, Nailar:
Ki pulit jong ka Haryana ki la ïoh ban kem ïa kiba bun ngut ki Rohingya ha kaba ïadei bad ka jingjia ïakynad ba dang shen ha Nuh distrik.
Kumba la ïathuh u Narender Bijarniya, uba long u Superintendent of Police ha Nuh, la ong ba ki la don kumba katto katne ngut ki poiwir Rohingya kiba la shu kam trai ïa ki jaka puta kiba dei jong ka Haryana Shahari Vikas Pradhikaran kaba don ha Tauru, ha kaba kane ka la pynlong ban pynpra noh ïa ki ïing ba ki la shna ha katei ka jaka.
Ha kaba ïadei bad kane, ki la don kumba katto katne ngut napdeng jong ki kiba la shah ithuh bad kiba la donkti ha ka ban kawang maw bad ïashim bynta ha ki jingïakynad kaba la jia ha ka 31 tarik, Naitung.
Ki heh ba dei khmih ïa mynta ki dang khmih bniah ïa ki kot ki sla jong ki, bad na ka jingpynlong ïa ka jingtohkit kaba hashwa, la lap ba kine baroh ki la pyndonkam ïa ki Refugee Identity Card ba la ai da ka United Nations.
Kiba bun na ki Rohingya kiba shong basah ha Nuh ki dei kiba la wan poi na Rakhine kaba don ha Myanmar hadien ba la jia ka jingïakynad ha u snem 2017 bad ki la rung beaiñ ha India lyngba kiba bun ki lynti.
