New Delhi, Nailar:
Ka shongknor jong ka Congress Parliamentary Party (CPP) ka Sonia Gandhi ka la ïakynduh bad ki nongïalam ka seng jong ka Manipur, kynthup ïa u Myntri Rangbah barim u O. Ibobi Singh lem bad kiwei na ka bynta ban ïakren bad ïamir jingmut ha kaba ïadei bad ki jinglong jingman ha ka jylla. Nalor ki nongmihkhmat jong ka seng Congress ka Manipur, ha ka jingïalang ba la pynlong hapoh ka jaka shong jong Sonia Gandhi ha Parliament la leit ban ïashim bynta da u President jong ka seng Congress u Mallikarjun Kharge, u nongïalam jong ka seng u Rahul Gandhi, bad u General Secretary (organisation) u KC Venugopal.
Ha kane ka jingïalang, ki nongïalam jong ka seng Congress ki la ïakren sani bha ha kaba ïadei bad ki jinglong jingman ba la jia ha ka jylla Manipur, ha kaba la mih biang sa shisien ki jingïakynad ha kiba bun ki thaiñ.
