New Delhi, Nailar:
U dkhot ka Rajya Sabha jong ka Aam Aadmi Party (AAP) u Raghav Chadha ha ka sngi Palei u la kyntait ba ka la long ka jingkynnoh ka bym don nongrim kumba la kynnoh ka seng Bharatiya Janta Party (BJP) ba u la pynrung da kaba leh thok ïa ki jingsoi jong ki dkhot ka ïingdorbar ha ka por ba la tyrwa ïa ki kyrteng jong ki khlem pan jingbit na ka bynta ban pynrung ha ka kynhun hapoh ka Delhi Services Bill.
U la ong ba ki kyndon ha kaba ïadei bad ki kam ha Rajya Sabha kim da donkam ban pan jingbit ha kaba ïadei bad ka jingshim ïa ki jingsoi jong ki MP na ka bynta ban tyrwa ïa ki kyrteng jong ki ha kum kane ka kynhun. U Chadha u la ong ba u khlem shim ïa ki jingsoi ne ban phah ïa ki.
“Ki kyndon ki la ong ba na ka bynta ban thaw ïa ka Select Committee, ki MP ki la donkam ban tyrwa ïa ki kyrteng jong kino kino ki dkhot ha kaba ym donkam ban shim jingsoi, khlem ka jingthoh ka ban ai jingbit ïa u dkhot ba ïa ka kyrteng jongno ba la tyrwa la dei ban kynthup ne donkam. Ha kaba ïadei bad kane ngam shym la shim ïa ki jingsoi, ne phah ïa kino kino ki jingsoi. Kumba la shem, la ong ba kam shym la don kano kano ka jingmudui, ki jingbuh jingthoh bad ki jingpynbna ki ban pynpaw ba don ka jinglehthok halor ki jingsoi,” la ong u Chadha ha ka jingïalang bad ki nongthoh khubor ha ryngkat ka jingdonlang jong baroh ki MP jong ka AAP.
