Srinagar, Nailar:
Ki la don kumba 1,050 ngut ki lehnoh bad 319 ngut ki shipai ïada kiba la shah pynïap ha ki 791 tylli ki jingjia ba ïadei bad ki kam thombor jong ki lehnoh ha Jammu & Kashmir naduh u 2018, kane ka long katkum ka jinglum jingkheiñ ba la buh da ka sorkar.
Kumba la ïathuh ka Ministry of Home Affairs, la ong ba ki la don kumba 791 tylli ki jingjia kiba ïadei bad ki kam pyntriem jong ki lehnoh kynthup 626 tylli ki jingjia ïasiat ba markylliang hapdeng ki lehnoh bad ki shipai ha Jammu & Kashmir kiba la jia naduh u snem 2018 haduh ka 31 tarik, Naitung, 2023.
“Ha u snem 2018, ki la don kumba 228 tylli ki jingjia ba ïadei bad ki lehnoh ba la jia ha kaba ka la long 153 tylli ha u 2019, 126 tylli ha u 2020, 129 tylli ha u 2021, 125 tylli ha u 2022 bad 30 tylli haduh ka 31 tarik, Naitung, 2023,” la ong u Myntri khynnah jong ka sorkar kmie uba dei khmih ïa ka tnat ki kam pohïing u Nityanand Rai ha ka jingai jubab jong u.
Kumba la buh jingkheiñ la ong ba ha ki 791 tylli ki jingjia ba ïadei bad ki lehnoh, ki la don kumba 1,050 ngut ki lehnoh kiba la shah pynïap ha kaba ka la bun eh da 257 ngut kiba la shah pynïap ha u 2018, bud da 221 ha u 2020, 187 ngut ha u 2022, 180 ngut ha u 2021, 157 ngut ha u 2019 bad 50 ngut haduh ka 31 tarik, Naitung, 2023.
Shuh shuh kumba la buh jingkheiñ la ong ba naduh u 2018 haduh ka 31 tarik, Naitung, 2023, ki la don kumba 319 ngut ki shipai ïada ri kiba la shah pynïap. Nalor kane la ïathuh ba ki la don kumba 90 ngut ki shipai ïada ri kiba la shah pynïap ha u 2018, 80 ngut ha u 2019, 63 ngut ha u 2020, 42 ngut ha u 2021, 32 ngut ha u 2022 bad 11 ngut ha u 2023.
