Srinagar, Nailar:
Ki shipai ïada ri ki la lah ban pynpulom ïa ka jingthmu jong ar tylli ki kynhun lehnoh jong ka Lashkar-e-Taiba (LeT) da kaba ïoh kem ïa hynriew ngut ki nongïarap jong ki lehnoh ha Kashmir, la ïathuh ki pulit hynnin ka sngi.
Ïa kine ki kynhun la lah ban pyntroiñ noh ha Uri kaba don ha Baramulla bad Budgam distrik jong ka Jammu & Kashmir.
Ki la ïathuh ba ka kynhun ba la ïatreilang hapdeng ki pulit ka Baramulla bad ka kynhun 16 SIKHLI jong ka tnat Army ki la pynlong ïa ka jingleit khynra bad ka ha ka thaiñ Churunda Uri la lap ba la don uwei u briew ïa uba la shang shane shatai bad uba la pyrshang ban phet haba u la ïohi ïa ka kynhun jong ki shipai ha kaba u la shah kthong ha ka kynhun shipai.
“U la shahkem noh ha ka kyhun jong ki shipai. Ha ka por ba la khmih bniah na u, la lap ïa ar tylli ki bom kawang kti, bad mar mar la ïalam ïa u na ka bynta ka jingtohkit,” la ong ka jingthoh ba la wan na ki pulit.
Haba la tohkit bniah la tip ba ka kyrteng jong u ka dei u Showkat Ali Awan jong ka Churunda Uri.
Ki pulit ki la ïathuh ba ha ka por ba la pynlong ïa ka jingtohkit u la phla ïa ki kyrteng jong ki para ba ïatreilang bad u, ha kaba ïa kine la tip kyrteng kum u Ahmad Din bad u Mohammad Sadeeq Khatana, kine baroh arngut ki dei ki nongshong shnong jong ka Churunda.
Kine ki arngut ruh ki la shah tohkit, bad na kine la lap ïa ar tylli ki bom kawang kti, ka pistol China bad u Magazine bad ki song kuli, la ïathuh ki pulit.
