Bhopal, Nailar:
Ka Madhya Pradesh Congress Committee ka la ithuh ïa 106 ngut ki kyrtong ki ban ïashim bynta ha ka ilekshon Assembly ka ban sa long ha ka jylla, la ïathuh u heh jong ka seng Congress ïa u bym shym la kwah ban pynpaw kyrteng.
Na ki 106 ngut 66 ngut kin sa ïakhun ha ki konstitwensi ha kaba ka seng kam pat u jop ha ka jingïakhun ïa ki lai tylli ki ilekshon Assembly kiba la dep bad kiba la shah synshar ha ka seng Bharatiya Janata Party.
Kiwei pat ki 44 ngut ki dei kiba dang bat ïa ka shuki kum ki MLA. Ka seng ka don sa 56 ngut ki MLA, ka jingdonkam jong ki dkhot hapoh ka ïingdorbar ka long 230 ngut hynrei la ngeit ba kine ki MLA ki donkam ban trei shuh shuh hashwa ba kin pynshisha ba ki long ki kyrtong ki ban ïakhun ha ki ilekshon ki ban sa long.
Kumba la ïathuh, la ong ba ka seng kam pat pynbna paidbah ïa ki kyrteng jong ki kyrtong ki ban ïakhun ha kine ki ilekshon.
U President jong ka seng Congress ha Madhya Pradesh u Kamal Nath u la ong ba ki briew kiba la shah ithuh ki la ïoh jingtip shaphang kata bad ym donkam ban pynbna paidbah ïa ki kyrteng jong ki.
Ka seng Congress ka la jop ha ki 114 tylli ki konstitwensi ha ka jingïakhun ïa ka ilekshon Assembly kaba la long ha u snem 2018 bad thaw sorkar.
Hynrei ha u Lber jong u snem 2020, ki la don kumba 28 ngut ki MLA kiba la ai ka jingkyrshan sha ka kynhun u Jyotiraditya Scindia ha kaba ki la mih noh na ka seng, ha kaba kane ka la wanrah ïa ka jingkhyllem noh jong ka sorkar u Kamal Nath bad ka seng BJP ka la wan ha ka bor synshar tang hadien 15 bnai ba thaw sorkar ka Congress.
