Bengaluru, Nailar:
U Symbud Myntri Rangbah jong ka Karnataka u DK Shivakumar ha ki khyndiat sngi ba la leit u la ong ba un shongthait noh na ka kam saiñpyrthei lada jia ba ka jingshah kynnoh donkti jong u ban klop tyngka na ki kontraktor ka dei kaba shisha.
Ki la don kumba katto katne ngut ki kontraktor jong ka Bruhat Bengaluru Mahanagara Palike (BBMP) kiba la kynnoh ba ka sorkar Karnataka kam shym la siew lut ïa ka pisa ba sah bad katkum ka jingtip ba la ïohlum la ong ba ki la don kumba katto katne ngut ki kontraktor jong ka BBMP kiba la kynnoh ba ka sorkar ba mynta ka la dawa da kumba 15 per cent ka nong.
Kum shi bynta ban ai jubab ïa ki jingkylli jong ki nongthoh khubor hangne, u Sivakumar u la ong, “Ki nongïalam ka liang pyrshah kynthup u Myntri Rangbah barim u Basavaraj Bommai bad u MLA u R Ashoka, ki la ïakren shaphang ki Bill jong ki kontraktor. Balei ba ïa ki Bill ym shym la siew haba ka sorkar ka don ha ka bor?”
” U Bommai ne u Ashok, kiba don ha ka sorkar kiba khanglad ban siew ïa ki Bill jong ki kontraktor? Hato kim don pisa? Ïa ka jingtrei ym shym la leh bha? Ai ba ki nongïalam ka BJP kin ai shwa ïa ka jubab halor kane ka jingkylli. Ngan sa ai kiwei pat ki jubab sha ki kontraktor,” la ong u Shivakumar.
