Bengaluru, Nailar:
U President jong ka Karnataka State Contractors’ Association u D Kempanna, uba la rai ban ïakhun na ka bynta ka ’40 per cent ka Commission’ na ka bynta ki Tender jong ka sorkar kaba hashwa ka BJP, mynta ka la buh por ïa ka sorkar Congress haduh ka 31 tarik, Nailar ba kan pyllait noh ïa ka jingsiew kaba sah kaba T. 25,000 klur ba la dei ban siew sha ki kontraktor.
“Ngi la pan por ban ïakren bad u Myntri Rangbah u Siddaramaiah bad u Symbud Myntri Rangbah u D K Shivakumar, bad lada ym lah ban leh ei ei halor kane ka mat, ngin sa khot da ka jingïalang jong ka Association ha ka ban shim ïa ka rai,” u la ong.
Ha ka jingai jingkren ha ka jingïalang bad ki nongthoh khubor bad ki nongkitkam jong ka seng ha ki khyndiat sngi ba la leit, u la ong ba kin sa phah ïa ki kot sakhi ha ki 12 tylli ki kot sha ka kynhun jong uwei u briew ba la khlieh da u nongbishar ba la shongthait.
Ha kaba ïadei bad ka jingpynshisha ba u Shivakumar u la dawa da kumba 15 per cent ka Commission ban pyllait ïa ka pisa kaba sah sha ki kontraktor jong ka BBMP, u Kempanna u la ong, “Ym tang kane kawei ka jingjia ka la leit jia ha ka Association, bad ngim don lad ban don ka jingshimkhia naba ka kynhun kaba pait ka lah ban buh ïa kine ki jingkynnoh. Ai ba kin ai ki sakhi halor kane, ngin sa kyrshan ïa ki ne leit sha ka ïingbishar.”
U la pynshisha shuh shuh da kaba ong ba ym don uwei ruh u kontraktor u ban mudui halor ka jingpan ïa ka nong ha ka sorkar kaba thymmai, bad kim shym la don ki jingkylli ki ban mih naba la tip shai ba ym don ki Work Order ki ban mih thymmai.
