Jaipur, Nailar:
Kum shi bynta ban buh ka jingkynnoh pyrshah ïa ka sorkar Rajasthan ba ka la long ka sorkar kaba khlaiñ bha ban bamsap, u nongkhmih bniah ha kaba ïadei bad ki kam ilekshon jong ka seng BJP u Pralhad Joshi u la pynshisha da kaba ong ba ki kam bamsap kiba thymmai bad ki kam leh be-ijot ki la paw hakhmat eh hapoh ka seng Congress ba la lamkhmat da u Ashok Gehlot.
Ki la don kumba 16 per cent na ki jingjia bashyrkhei bad ki jingjia pynïap briew ba la buh jingthoh ha ka ri ki dei kiba la bun eh ha Rajasthan, la pynshisha u Myntri jong ka sorkar kmie. U la don ha Jaipur na ka bynta ka jingïalang jong ki nongbud jong ka seng na ka bynta ban pyrkhat ïa ki kam ba ïadei bad ka ilekshon Assembly ka ban la long kham hadien ha une u snem.
“Ka sorkar Rajasthan ka la long kawei na ki sorkar kaba la khlaiñ bha ha ki kam klop tyngka ha ka ri. Ka Rajasthan ka la paw hakhmat eh kum kawei na ki jylla kaba bun tam ki jingjia shah lehbeijot. Ki jinglait tuh jong ki jingkylli na ka bynta ki eksam thungkam ki la long palat ïa ka 16 sien,” la ong u Joshi ha ka jingïakren bad ki nongthoh khubor. Kiba bun ki kam pynroi ki la sahkut bad la donkam da ka sorkar BJP ha ka jylla. Lada u Myntri Rangbah u Gehlot u kwah ban leh bha na ka bynta ki briew ki baduk, balei ba um leh ne trei ha ki saw snem shiteng, la buh jingkylli u Joshi.
