Mumbai, Nailar:
U Symbud Myntri Rangbah jong ka Maharashtra u Ajit Pawar u la ong ba ka jingthmu ba kham ha shwa jong ka kynhun National Democratic Alliance (NDA) ba la lamkhmat da ka seng BJP ka long ban pyntikna ba kan sa jop ha kiba bun tylli ki konstitwensi ha ka jylla bad ha ka ri ha ka jingïakhun ïa ka ilekshon Lok Sabha ka ban long ha u snem ban wan.
U Ajit Pawar bad ki 8 ngut ki MLA jong ka seng NCP jong u ki la leit ban pynïasoh bad ka sorkar synrop jong ka seng Shiv Sena-Bharatiya Janata Party (BJP) ba la khlieh da u Eknath Shinde ha ka 2 tarik, Naitung. Kane ka la wanrah ïa ka jingpait hapoh ka seng NCP ba la seng da u kñi jong u bad u riewsaiñ pyrthei uba paw u Sharad Pawar.
Kum shi bynta ban ai jubab halor ki jingkylli, u la ong, “Ka jingthmu kaba nyng-kong eh jong ka kynhun NDA ka long ban pyntikna ban jop ha kiba bun tylli ki konstitwensi ha ka jylla bad ha ka ri ha ka jingïakhun ïa ka ilekshon Lok Sabha ka ban sa wan. Kine ki kynhun ba la ïasnohktilang mynta ki la ïatreilang na ka bynta kane ka jingthmu bad tang hadien kane kin sa lah ban phai khmat ha kaba ïadei bad ka ilekhson Assembly ki ban long ha u Risaw bad Naiwieng jong u snem 2024).” “Ki kyrtong kiba kham khlaiñbor kin sa shah jied ha ki seng kum ki kyrtong ban ïakhun ha ki ilekshon…ka jingthmu jong ngi ka long ban ïakhun bad pynrem ïa ki seng ba pyrshah,” u la ong.
