New Delhi, Nailar:
Ka jingïai bteng jong ka jinghap slap bad ki jingtwa khyndew ka la shim ïa ka jingim jong 66 ngut ki briew ha Himachal Pradesh bad ha Uttarakhand naba ka jingpyntreikam ha ka ban wad bad ban pyllait im ïa ki briew kynthup ïa kiba la mynsaw bad ka jingsei ïa kiba la ïap na ki jingtwa namar ki jingtwa jong ki ïing ha kiba bun tylli ki jaka ka dang ïai bteng. Kiba bun ki briew kiba la ïap ki dei ha Himachal Pradesh, ha kaba ki la don kumba 60 ngut ki briew kiba la ïap naduh ba la sdang ka jinghap jong u slap ha ka 13 tarik, Nailar, la ïathuh u Myntri Rangbah jong ka jylla u Sukhvinder Singh Sukhu.
Kumba la ïathuh ka jaka treikam kaba dei khmih ïa ka jinglong ka suiñbneng ka la ong ba ka jinghap jong u slap ka la sdang duna, hynrei ka jinghap jong u slap uba jur ka la long ha Himachal Pradesh ha kine ki sngi ban wan bad ha Uttarakhand kan sa bteng ha ki saw sngi ban wan.
Ha ka sngi Ba-ar, ki nongai jingïarap ïa ki lanot ki la lap ïa lai tylli ki metïap na ka jingtwa namar ka jingtwa khyndew.
Ïa kawei ka met la ïoh ban sei na ka jingtwa jong ka Shiva Temple ha Shimla katba arngut kiwei pat ki la ïap na ka jingjia jong ka jingtwa khyndew biang ha ka nongbah.
Ki la don kumba phra tylli ki ïing, kynthup ïa hynriew tylli ki ïing dara, ki la khyllem bad kawei ka ïing shohdoh ka la shah tep hapoh ka jingtwa hadien ba la jia ka jingtwa khyndew ha ka shnong Krishnanagar kaba don ha Shimla.
Ki la don baroh kumba 19 tylli ki metïap ba la ïoh ban tam naduh ka lah sngi U Blei, ïa ki 12 tylli na Shiva Temple kaba don ha Summer Hill, san tylli ha Fagli bad ar tylli ha Krishnanagar, u la ong ha kaba u la bynrap shuh shuh da kaba ong ba ki la don shuh shuh sa kumba 10 ngut ki briew kiba dang sahkut ha ka jingtwa jong ka Shiva Temple, kaba la twa ha ka lah sngi U Blei.
Baroh ki skul bad ki kolej ha ka jylla ki la khang lut hynnin ka sngi namar ka jingthut ka suiñbneng, la ong ka hukum ba la phah da ka tnat pule-puthi.
