New Delhi, Nailar:
U Symbud Myntri Rangbah jong ka Karnataka u DK Shivakumar ha ka sngi Ba-ar u la ong ba ka jylla jong u ka la rai ban pyllait ïa ka um da 10 tmcft sha Tamil Nadu, hynrei ka TN ka la dei ban ïatreilang na ka bynta ka jingthmu pyntreikam ïa ka Mekedatu Project naba kan sa ai jingmyntoi ïa baroh ar tylli ki jylla. Kumba la pynpaw, la ong ba ka jingthmu jong ka Karnataka ka long ban pyrkhat ruh ïa ki briew ka jylla na ka bynta ka jingmyntoi na ki jaka den um.
Kane ka jingpynbna ka la long shi sngi hadien ba ka Tamil Nadu ka la leit sha ka Supreme Court da ka jingbuh jingkyrpad ban hukum ïa ka Karnataka ba kan pyllait kumba 24,000 cusecs ka um man ka sngi khnang ban lah ban ïarap ha ka ban pynim ïa ki jingthung jingtep ha ka jylla.
Ha ka jingïakren bad ki nongthoh khubor hadien ba la dep ban ïashim bynta ha ka jingrakhe ïa ka Independence Day ha ka jaka treikam jong ka seng Congress ha Karnataka, u Shivakumar, uba long ruh u Myntri uba dei khmih ïa ka tnat sam umbam-umdih, u la ong ba ka jylla ka la dep ban pyllait lypa ka um sha Tamil Nadu.
