Amaravati, Nailar:
Kum shi bynta ban ai jubab halor ka khubor ba la bna ban leit pynïasoh bad ka kynhun National Democratic Alliance (NDA), u Myntri Rangbah barim jong ka Andhra Pradesh u Chandrababu Naidu ha ka sng Ba-ar u la ong ba un sa ïakren ha kaba ïadei bad kane ka bynta ynda la dei ka por.
Haba la kylli shaphang ka jingthmu jong u ha kaba ïadei bad ka jingleit ban pynïasoh bad ka kynhun NDA, u President jong ka Telugu Desam Party (TDP) u Naidu u la ong, “Kam pat dei ka por ban kren shaphang ka jingleit ban pynïasoh bad ka sorkar NDA. Ngan sa kren shaphang kata ynda la dei ka por.”
U Chandrababu Naidu uba la ïalam ïa ka seng Telugu Desam Party (TDP) u la mih noh na ka kynhun NDA kum shi bynta ban ïakhih pyrshah ïa ka jingkyntait jong ka sorkar kmie ban ai ka bhah kaba kyrpang na ka bynta ka Andhra Pradesh.
Ha kaba ïadei bad kane, u Naidu u la ong ba ka bynta jong u ka la paw shai na ka bynta ban trei shitom ha ki kam saiñ pyrthei ha ka ri ha u 2024.
“Ka bynta kaba hakhmat ka dei ka Andhra Pradesh. Kane ka dei ka mat kaba kongsan tam. Ngan sa pynkhreh na ka bynta ban tei bad ban pynbha biang ïa ka jylla,” la ong u heh jong ka TDP.
