New Delhi, Nailar:
Ki nongrep ki la pynlong da ka jingïakhih ban pyrshah ïa ka sorkar Karnataka kaba la bteng ban pyllait ïa ka um na wah Cauvery sha Tamil Nadu. Ka sorkar Karnataka ka la shim ïa ki sienjam na ka bynta ban pyllait um sha Cauvery, khyndiat sngi, hadien ba ka sorkar Tamil Nadu ka la leit mih sha Supreme Court na ka bynta ban pan hukum ha ka ban phah pyllait um.
Ha ka sngi Balang ka Cauvery Neeravari Nigam Limited (CNNL) ka la pyllait ïa ka um da 11,602 cusecs na KRS Reservoir, ha kaba 9,136 cusecs la pyllait sha ka wah, katba kaba dang sah sha kiba bun ki nala pynïaid um ba la thmu na ka bynta ban pynbiang um sha ki jaka rep. Ki bor ba dei khmih ha ka sngi Ba-ar ki la pyllait ïa kumba 9,133 cusecs ka um, kaba la long 8,570 cusecs ha ka lah sngi U Blei.
Ha kaba ïadei bad kane, ka jingïakhih ban pyrshah halor ka jingpyllait ïa ka um na ka wah Cauvery sha Tamil Nadu ka la ïai bteng ha Mandya, ha kaba ki nongrep ki la pynlong ïa ka jingïakhih ha TB Circle kaba don ha Maddur. Ki nongïakhih ki la pynshisha da kaba ong ba ki jingthung jingtep ha Mandya ki la shah ktah na ka daw ka jingduna um. Kumba la sakhi, ki la ong ba ka sorkar jylla ka la ïai bteng ban pyllait ïa ka um sha Tamil Nadu kaba long shi bynta kaba ktah na lyndet ïa ki nongrep jong ka jylla.
