Bhopal, Nailar:
U Myntri Rangbah barim jong ka Madhya Pradesh bad u MP jong ka seng Congress ha Rajya Sabha MP, u Digvijaya Singh u la ong ba ïa ka Bajrang Dal yn ym khang lada jia ba ka seng jong u ka wan ha ka bor synshar hynrei ïa ki runar bad ki nong thombor yn ym pyllait na ki kti jong ka aiñ.
U Singh u la kren ïa kine ki kyntien katba u dang ïakren bad ki nongthoh khubor ha ka shlem treikam jong ka Pradesh Congress Committee (PCC) ha ka nongbah jong ka jylla ha Bhopal ha ka sngi Balang. Haba la buh jingkylli ha kaba ïadei bad ka jingkhang ïa ka Bajrang Dal hadien ba ka seng Congress kan wan ha ka bor synshar ha ka jylla, u Singh u la ong, “Ngin ym khang ïa ka seng Bajrang Dal naba ki dang don ki briew kiba bha hapoh ka seng Bajrang Dal ruh. Hynrei ngin ym pyllait ïano ïano ruh kiba donkti ha ki kam thombor ne ki jingïakynad.”
Ha kaba ïadei bad kane, haba ïakren halor ka mat ba ïadei bad ka Hindutva, u Singh u la ong, “Nga dei u Hindu bad ngan sah kum u Hindu. Nga bud ïa ka niam Hindu bad u nongbud jong ka Sanatan Dharma. Nga dei u Hindu ba kham bha ban ïa ki nongïalam jong ka seng BJP.””Ka ri India ka dei na ka bynta baroh, la ka long ki Hindu, Muslim, Sikh bad Khristan. U Myntri Rangbahduh u Narendra Modi, u Myntri Rangbah u Shivraj Singh Chouhan ki la dei ban sangeh ha ka ban phiah ïa ka ri. Dei ban wanrah jingsuk ha ka ri, yn sa lah ban treikam tang lada don ka jingsuk,” la ong u Singh.
