New Delhi, Nailar:
U MP jong ka Bharatiya Janata Party (BJP) ha Lok Sabha u Rajyavardhan Singh Rathore ha ka Sngi U Blei u la pynshisha da kaba ong ba ka tynrai jong ka jingïakynad ha Shatei Lam Mihngi ka dei na ki rukom pyntreikam jong ka seng Congress ha ka por ba ka dang bat ïa ka jingsynshar ha ka ri.
“Ka daw tynrai jong ki jingïakynad ha Northeast ka dei na ki rukom pyntreikam jong ka seng Congress. Ka Congress hi ka tip ïa kane. Ka Congress ka dei ka ka daw halor ki kam pyntriem jong ki lehnoh kaba la jia ha Kashmir da bun bun snem. Ka Congress ka la leh ïa ka kam jong ka jingphiah ïa ka ri ha ka jingsngew ïapher jaitbynriew, ki kynhun bad ki ktien. Ka seng Congress ka la buh ïa ka ri ha ka thliew da kaba buh kawei ka longïing ha khlieh duh,” la ong u MP jong ka BJP ha Jaipur.
U la kynnoh ruh ba ka Congress ka la rung hapoh bad ka Communist Party of China”, ha kaba kane ka buh jingma ïa ka jingmyntoi jong ka ri India.
