New Delhi, Nailar:
U Myntri Rangbah jong ka Delhi u Arvind Kejriwal bad u Myntri Rangbah jong ka Punjab u Bhagwant Mann kin sa ai jingkren ha ka jingïalang paidbah ka ban long ha ka 20 tarik, Nailar bad la khmih lynti ba ka seng Aam Aadmi Party kan sa pynbna ïa ki jingai jingmyntoi sha ki nongthep vote hashwa ban kut ka ilekshon Assembly jong une u snem ha Madhya Pradesh, la ong u nongïalam jong ka seng AAP.
U Kejriwal, uba long ruh u nongai buit ai bor jong ka seng AAP, bad u heh nongïalam jong ka u Mann kin sa ai jingkren ha ka jingïalang paidbah bad ba kin sa ïakren bad ïaphylliew jingmut ruh bad ki paidbah ha Rewa, kaba long shi bynta jong ka thaiñ Vindhya, la ïathuh u National Joint Secretary jong ka seng u Pankaj Singh, ha ka jingïakren bad ki nongthoh khubor. U Singh u la ong, “Ha ka por ba don ka prokram, u Kejriwal un sa ai kumba katto katne ki jingpynbna. Naba baroh ki tip, u Kejriwal ym tang ba un sa ai ïa ki jingpynbna hynrei un sa ai ruh ki jingai jingmyntoi sha ki paidbah.”
Ha ka jingai jubab halor ki jingkylli, u Singh u la ong ba ka seng AAP ka la don jingthmu ban ïakhun ha baroh 230 tylli ki Assembly konstitwensi ha Madhya Pradesh ha kaba mynta ka dei kaba dang shah synshar ha ka seng Bharatiya Janata Party (BJP).
