Bengaluru, Nailar:
U Myntri Rangbahduh Narendra Modi ha kine ki khyndiat sngi ba la leit, u la kynthoh jur ïa ka sorkar Congress ha Karnataka, ha kaba u la ïathuh lypa ba ki skhim kiba ka la wanrah kin sa shah shop ha ka jylla, bad ka pisa kaba la thmu na ka bynta ki kam pynroi kan sa jah lut.
Ha kaba ïadei bad kane, ka seng BJP ka la thmu ban khmih bniah halor ki jingshah ktah jong ki jingai jingmyntoi sha ki nongthep vote, naba ka ilekshon Lok Sabha 2024 kan sa long.
Kine san tylli skhim ki long ka Anna Bhagya, Gruha Lakshmi, Shakti, Gruha Jyoti bad Yuva Nidhi, kin sa lah ban ai jingmyntoi sha ki 5.21 klur ngut ki nongthep vote, kynthup ïa ki samla ki bym pat biang kam biang jam ha ka rta kaba 18-25 snem, ha kaba ïa kiba la dep ban pyntreikam la shem ba ka la long kaba jop.
Lait noh tang ka Yuva Nidhi, ka sorkar ka la pyntreikam ïa kiwei pat ki saw tylli ki skhim kiba dang sah.
“Ngi tip ba ki jingkular ki la long ki bynta ha kaba ïadei bad ka jingjop jong ka seng Congress, kumta ngi la pyrshang ban pynlong ïa ka jingkhmih bniah la kine ki jingkular kin ktah jur ïa ki nongthep vote bad ban shah pynkylla sha ki vote na ka bynta ka seng Congress,” la ong u heh nongïalam jong ka seng BJP, ha kaba u la ong ba ki briew ki ju shah pynbiej da ki jingai sngewbha ba bun rukom.
