New Delhi, Nailar:
Ka jingïap jong ki briew na ka jinghap jong u slap uba jur ha Himachal Pradesh ka la kiew sha ka 74 ngut hadien ba la ïoh ban sei sa ïa kawei ka metïap na ka jingtwa jong ka Shiva Temple kaba don ha Shimla. Kumba la ïoh jingkheiñ la ong ba ka jingwan hap jong u slap ka la wanrah ïa ka jingduhnong kaba T. 10,000 klur ha Himachal Pradesh, nalor ki 74 tylli ki mynsiem briew bad ki la don kumba 1,000 ngut kiba la shah pyllait im.
Ki la don sa kumba arngut ki briew kiba la ïap ha Chamba distrik, la ïathuh ki heh pulit ha ka sngi Palei. Ki la don kumba 21 ngut na kine kiba la ïap kiba la long na ka daw ka jingtwa khyndew ha ki lai tylli ki jaka kiba don ha Shimla, kata ha Shiva temple kaba ha Summer Hill bad ha Fagli bad Krishnanagar.
Ki la don kumba 8 ngut ki briew ïa kiba la suba ba ki dang shah tep ha ka jingtwa jong ka Temple. Arngut ki briew kiba la ïap la ïoh jingtip ba ki dei na Chamba distrik, ha kaba da ka jingdon jong kine ki briew, ka jingïap jong ki briew ha kine ki saw sngi ba la leit ka la kiew sha ka 74 ngut, la ong ka State Emergency Operation Centre. Ka jylla ka la ïoh ïa ka jinghap jong u slap uba jur da kumba lai sngi lynter, ha kaba ka la sdang naduh ka sngi U Blei. Ki la don kumba 217 ngut ki briew kiba la ïap na kiba bun ki jingjia kiba la mih na ka daw jong ka jingjur slap ha Himachal Pradesh haduh ba la sdang ka jingwan hap jong u slap ha ka 24 tarik, Jylliew.
Ki kynhun pyllait im ki dang don mynta hapdeng ka jingpyntreikam na ka bynta ban ai jingïarap ïa ki briew ha ki jaka ba la jia ki jingtwa khyndew ha Shimla.
Haduh mynta, ki la don kumba 14 tylli ki metïap ba la ïoh ban sei na Summer Hill, san tylli na Fagli bad ar tylli na Krishnanagar, la ïathuh u SP Gandhi. Ki shipai ka tnat Indian Army, Air Force bad kiwei pat ki kynhun pyllait im ki la ïoh ban pyllait ïa kumba 309 ngut ki briew na ki jaka ba la ngat ha ka jingshlei um kaba don ha Fatehpur bad Pong Dam kiba don ha Indora jong ka Kangra distrik. U Myntri Rangbah jong ka jylla u Sukhvinder Singh Sukhu ha ka sngi Palei u la leit jurip bniah ïa ki thaiñ ha ka jylla kiba la shah ktah na ka jingjur jong u slap bad ka jingshlei um.
