New Delhi, Nailar:
Ha ka sngi ba la rakhe ïa ka jingïoh Laitluid jong ka ri India, u Myntri Sorkar Pdeng uba dei khmih ïa ka tnat ‘Housing & Urban Affairs’ bad ‘Petroleum and Natural Gas’, u Hardeep Singh Puri u la pyllait paidbah ïa ka Jingrwai Ieit Ri (kaba la ring bad pynpher sur thymmai) kaba la ïashim bynta da ki khlur lehkai kiba la lah ban wanrah ïa ka nam bad burom ïa ka ri India ha ki jait jingïalehkai bapher bapher bad ïa kaba la ïoh ïa ka jingkyrshan na ka Indian Oil Corporation Ltd.
U Myntri ka Sorkar Pdeng u la pyllait paidbah ruh ïa ka ‘music video’ kaba jer kyrteng ka ‘Jaya Hey!’, kaba la ring dur ha kata ka rukom ka ban pyni ïa ka jingïaid lynti jong ka ri ha ryngkat ka thong ban buh ïa ka ri ha ka kyrdan kaba hakhmat duh – kaba la ïashim bynta da baroh ki nongshong shnong ban kyntiew ïa ka ïoh ka kot jong ka ri.
Haba ai jingkren, na ka liang u Hardeep Singh Puri u la ong ba ki jingïalehkai (sports) ha ka ri India ki dei ki sienjam kiba lah ban ïalam lynti ïa ka ri hakhmat ka pyrthei. U la ong ba ha ki jingïalehkai kam dei ka nam jop ne ka nam rem kaba kongsan, hynrei ka dei ka mynsiem ïakhun kaba lah ban wanrah ïa ka nam ka burom na bynta ka ri. U la ong shuh shuh ba ka ‘sports anthem’ ba la pyllait paidbah da ka Indian Oil sa shisien ka pynktik mynsiem ïa ka ri ha ki sienjam kiba ïadei bad ka jingphai khmat sha ki jingïalehkai (sports).
Ha ka bynta ba la pyllait paidbah ïa ka ‘National Anthem’ bad kumjuh ruh ïa ka ‘Sports Theme Song’ jong ka Indian Oil, na ka liang u Chairman ka Indian Oil – Shrikant Madhav Vaidya u la pynshai paidbah halor ki mat kiba ïadei bad ki sienjam kiba ka kompani ka la shim na ka bynta ban kyntiew ïa ki kam ïalehkai ha ka ri. Ha ka jingai jingkren jong u, u la ong ba ha kine ki sngi kiba mynta kumba la ban khia da u Myntri Rangbahduh ka ri ban phai khmat sha ki sienjam ban pynkupbor ïa ki ‘riew kynthei bad kumjuh ruh ban pynbiang ïa ki lad ai jinghikai na ka bynta ki nongïalehkai kiba don jingduna ha ki dkhot met, u la pynpaw ïa ka jingsngewkmen kaba jur ban khmih ïa ki sienjam kiba ka Oil India ka la lah ban noh synñiang sha ki kam ïalehkai ha ri. Khyndiat na ki sienjam kiba ka Oil India ka la lah ban shim na ka bynta ban kyntiew ïa ki kam ïalehkai ha ka ri ki kynthup ïa ka jingseng ïa ka ‘Corporate Women’s Hockey Team’ bad kumjuh ruh ban ai jingkyrshan na ka bynta ki nongïalehkai kiba don jingduna ha ki dkhot met lyngba ka sienjam kaba la tip kyrteng kum ka ‘Road to Paralympics 2024’. Lyngba katei ka sienjam la ïathuh ba la saiñdur na ka bynta ban ai jingkyrshan ïa ki nongïalehkai kiba don jingduna dkhot met ba kin lah ban leit ïashim bynta ha ka ‘Asian’ bad ‘Paralympic Games’
Ïa ka kyntien ‘Jaya Hey’ la pyndonkam ha ki nongrim bapher bapher ha ka jingim jong ki nongïalehkai. Khyndiat na ki nuksa ha ryngkat ki jingmut la pyndonkam bad pynkylla ïa ka kyntien ‘Jaya Hey’ sha ka kyntien ‘ka thong’, ka ‘jingïoh mynsiem’, ka ‘jingpyrta jingjop’, ka ‘jingjop ha ki jingïalehkai’, bad kumjuh ruh ka ‘jingjop jong ka ri India’.
Ïa ka sienjam la shim kum shi bynta ban pyninam ïa ka jingïaid lynti jong ki khlur ïalehkai jong ka ri naduh ba ki dang khynnah tat haduh ba kin da lah ban wanrah ïa ka nam bad ka burom na bynta ka ri. Khyndiat na ki nongïalehkai ki kynthup ïa u ‘Grand Master’ ha ka jingïalehkai Chess – R Praggnanandhaa, u nongïalehkai ‘Olympic barim jong ka ri – Pullela Gopichand, bad kiwei kiwei.
Ïa ka jingrwai la ring sur janai da kaba pyndonkam da ka ‘body music’ ha ryngkat ki sur tem jong ka ri India kiba lah ban pynkyndeh bad ai mynsiem na ka bynta ki nongïalehkai. Ïa ka ‘video’ ruh kumjuh la ring dur ha kata ka rukom ka ban pyni ïa ka thong bad ka mon kaba jwat kaba ki nongïalehkai ki la shim na ka bynta ban pynjanai ha ki jait jingïalehkai kaba ki ïa don bynta.
Halor kitei ki sienjam, na ka liang ka Indian Oil ka la don ïa ka bynta kaba kongsan kaba lah ban pyntikna ba ki nongïalehkai kin ïoh ïa ki lad jingïarap kiba ki donkam na ka bynta ban wanrah ïa ka nam bad ka burom. Katei ka sienjam jong ka Indian Oil ka don ruh ïa ka bynta ban kyntiew ïa ka ri, namar ki jingïalehkai (sports) ka dei kawei na ki jait kilan met kaba lah ban wanrah ïa ka jinglong kawei bad jingïatylli hapdeng ki mynsiem briew.
Katei ka sienjam jong ka Indian Oil ka don ïa ka thong ban ai mynsiem ïa baroh ki nongshong shnong jong ka ri India, ha ryngkat ka jingkyrmen ba ka ‘Jaya Hey’ kan ai mynsiem ïa uwei-pa-uwei u nongshong shnong ka ri India ba un lah ban noh synñiang na ka bynta ka bha ka miat bad ka roi ka par jong ka ri India – ban pynurlong ïa ka thong jong u Myntri Rangbahduh – Narendra Modi ban buh barabor ïa ka ri hakhmat duh.
