Patna, Nailar:
Ki pulit ki la ïoh ban kem ïa saw ngut ki briew kiba la donkti ban pynïap ïa u nongthoh khubor ha Bihar ha ka sngi Saitjaiñ.
Ïa kine ki runar la ïoh kem na Araria distrik kaba don ha katei jylla. Ka jingthwet jong ki pulit mynta ka dang ïai bteng na ka bynta ban ïoh kem sa ïa arngut kiwei pat kiba la shah kynnoh donkti ha ka kam pynïap briew.
Ka jingjia jong ka jingshah pynïap jong u nongthoh khubor ka la jia ha ka sngi Thohdieng ha ka thaiñ Raniganj Bazaar.
U Myntri Rangbah jong ka jylla u Nitish Kumar u la ong ba kane ka jingjia ka long kaba sngewsih haduh katta katta. U la hukum ïa ki heh pulit ba kin pynlong ïa ka jingtohkit kaba bniah halor kane ka jingjia kham kloi katba lah. “Kumno u nongthoh khubor u lah ban shah pynïap ha kane ka rukom,” u la ong.
U Vimal Kumar Yadav, uba la 35 snem ka rta u dei uba la trei bad ka Hindi Daily. U la shah pynïap ha ka jaka sah jong u kaba don ha ka shnong Premnagar.
“Ki runar ki la leit ban kyndar ïa ka phalor jong ka ïing jong u Yadav ha ka por 5.30 mynstep jong katei ka sngi bad ki la siat ïa u haba u la leit ban plie ïa ka phalor,” la ïathuh shuh shuh ki pulit jong ka Bihar.
U Yadav u la ïap hashen, ha kaba u heh pulit jong ka distrik bad u SHO jong ka Raniganj, bad ki pulit kiba dei khmih ïa katei ka thaiñ ki la leit bran bran sha katei ka jaka tang mar ïa ïoh jingtip halor ka jingjia.
