Mumbai, Nailar:
U heh nongïalam jong ka seng Nationalist Congress Party (NCP) u Sharad Pawar u la ong ba ki la don kumba katto katne ngut ki nongïalam jong ka seng kiba la kyntiap seng bad leit bad ka kynhun jong u Ajit Pawar jong ka seng NCP kiba la thmu ban leit ban pynïasoh bad ka sorkar jong u Shiv Sena (Eknath Shinde) bad ka BJP kiba la shah khmih bniah ha ka Enforcement Directorate (ED), la ïathuh ka tyllong khubor.
“Dang shen kumba katto katne ngut ki briew jong ngi ki la leit ban pynïasoh bad ka seng BJP ha kaba ïadei bad kane ka bynta… ki la don kumba katto katne ngut kiba la shah tohkit bniah ha ka EC…ki la don kumba katto katne ngut napdeng jong ki ki bym kwah ban shah tohkit,” la ong u Sharad Pawar, kumba la ïathuh da ki nongthoh khubor.
Kum shi bynta ban ai jingïaroh ïa u Myntri barim jong ka tnat ki kam pohïing jong ka Maharashtra u Anil Deshmukh, u heh nongïalam jong ka seng NCP u la ong,”…hynrei katto katne ngut kum u Anil Deshmukh ki la pdiang ban leit sha patok bad ban pynlut por 14 bnai. U la shah tyrwa ban leit ban pynïasoh bad ka liang jong ki ka seng BJP na ka bynta ban lait na ki jingshah tohkit hynrei u la ong ba um kwah ban leh ïa kaba bakla bad rai ba un ym ieh ne ïaid lait na ka aiñ…”
U Sharad Pawar ruh u la pynshisha da kaba ong ba ki la don kumba katto katne ngut ki nongïalam jong ka seng NCP kiba la leit ban pynïasoh bad ka seng BJP naba ki la shah byrngem ha ki kynhun sorkar, la ïathuh ka tyllong khubor.
