New Delhi, Nailar:
Uwei u briew uba la 70 snem ka rta, uba long u nongsakhi halor ka jingjia jong ka jingshah pynïap u khun jong u, u la shah siat ïap ha Bihar ha ka sngi U Blei ha ka por ba u dang leit ïaid kai step, la ïathuh ki pulit.
U Jawahar Chaudhary u la shah siat ïap ha ki katto katne ngut ki runar kiba la kah dur khmat ha Begusarai distrik khyndiat sngi hashwa ka jingleit mih jong u sha ka ïingbishar ha kaba ïadei bad ka jingjia jong ka jingshah pynïap u khun jong u.
U khun jong u Chaudhary u Neeraj u la shah pynïap ha u snem 2021 kumba la pynshisha da u khun ba-ar jong u ha kaba ïadei bad ka jingïakajia halor ka jaka puta.
Une u tymmen uba la 70 snem ka rta u la shah kylli jingkylli bniah kum u nongsakhi ha ka ïingbishar pyrshah ïa uba la shah kynnoh, ha kaba mynta u dang don ha patok, ha kaba u la dei ban shah set sa kumba khyndiat sngi na ka bynta ka jingshah tohkit.
Kumba la suba, la ong ba ka jingshah pynïap jong u ka lah ban don jingïadei bad katei ka jingjia, la ïathuh ka tyllong khubor kaba la wan na ki pulit. Kane ka dei ka sien ka ba-ar ban jia kum kane ka jingjia.
Ha ka taïew ba la lah, uwei u nongthoh khubor u la shah pynïap habar ka ïingsah jong u kaba don ha Araria kaba don ha Bihar hashwa ka jingshah tohkit bniah jong u halor ka jingjia jong ka jingshah pynïap u para jong u.
