New Delhi, Nailar:
Katkum ka jingwad bniah jong ka sorkar, la lap ba ki la don kumba 830 tylli na ki 1,572 tylli ki jaka pule jong ki ritpaid kiba la ïoh Scholarship ha kaba la ong ba kine ki lah ban dei ki skul kiba thok bad ki bym treikam shuh, la ïathuh ka tyllong khubor. Kane ka kam bamsap ka la saphriang sha palat 100 tylli ki distrik kiba don ha kylleng ki 34 tylli ki jylla bad ki Union Territory bad ïa ka jingtohkit halor kane la aiti sha ka kynhun Central Bureau of Investigation (CBI), la ïathuh ka kaiphot.
Ka jingdon jong kum kine ki jaka pule kiba leh thok ki lah ban nang bun naba la lap ba ki la don tang 1,572 tylli ïa kiba la dep ban khmih bniah. Ka jingdon jong baroh ki jaka pule jong ki rit paid ha ka ri kiba la ïoh ban pyntreikam ïa ki Scholarship sorkar ki la don kumba 1.8 lak tylli.
Ïa ka jingjia halor kane ka bynta la paw paidbah ha u snem 2020 haba ka la don ka jingujor ejahar ha ka sien kaba nyngkong ba la buh ha kiba bun ki jylla. Kata ha ka jingpynlong ïa ka jingtohkit ha ka sien kaba ar, ka Ministry of Minority Affairs (MMA) ka la jied ïa ka National Council of Applied Economic Research (NCAER) ba kan khmih bniah halor ka jingdon jong ki jingïapher ha u Nailar jong u snem 2022, la ïathuh ka tyllong khubor, ha kaba la bynrap shuh shuh da kaba ong ba ka jingpynlong ïa ka jingtohkit da ka NCAER kaba la jan don shi snem ka la lap ba ki la don kumba 830 tylli na ki 1,572 tylli ki jaka pule kiba dei kiba thok ne ki bym treikam shuh.
